黃銳林 - 包浩斯 (Bauhaus) 主席及創辦人做生意的，密實姑娘可能是假正經，但外表Open、內裏斯文者卻甚罕有，潮流服裝店包浩斯（Bauhaus）及其主席黃銳林，就是這許異數。
包浩斯形象前衛，賣的都是爛牛仔褲、鐵鏈潮服、車胎皮包，主攻型男潮女族類。如此公司，出自如此老闆。包浩斯主席黃銳林長髮披肩、打扮新潮，一副喜歡破格、走在時代尖端的模樣。
可是，這些都只是軀殼而已，黃銳林其實非常保守。九一年創業至今，從來不向銀行借錢；近年人人北望神州，他卻說中國太大，無力應付；最難以置信的，是其他公司上市時都許下豪情壯語，偏偏本週四上市的包浩斯，黃銳林竟說實際並無集資需要，更沒甚麼發展大計。
發展步伐慢條斯理，但包浩斯招股仍獲六百倍超額認購，凍結金額高達六十六億元，原來穩穩陣陣，亦可殺出「錢」途。
單看黃銳林的舉止言行，說他是年賺四千萬元的上市公司的主席，實在叫人難以置信。
包浩斯的招股發布會上，黃銳林滔滔說着自創「笑話」：「好多人以為我哋係飛仔舖，其實我哋內裏係君子。」又形容包浩斯似鴨：「喺水上面逍遙自在，但隻腳喺水底好辛苦不停游。」口若懸河，絕不像一般「廠佬」的低調。
他的打扮亦相當前衛，雖然四十有七，仍留及肩長髮，穿着一身自家創作品牌Tough的外衣及牛仔褲，猶如一名臭脾氣的藝術家，甚至可被列為超齡飛仔。
有規有矩 絕非亂來
他創辦的包浩斯，十足是其影子，極之反叛：門面黑卒卒，裝修灰沉沉，自家品牌Tough的產品，更非人人可以接受。例如零二年設計了一個用車胎製成的手提 袋，記者拿上手就像拿着一袋米，黃銳林笑笑口說：「個袋重成咁，邊有人會拎出街？ 但有唔少人買嚟做display，就係因為特別。」所售服飾強調設計「特別」，原來是其心聲：「我係咁諗，每個人行出街，都想同人哋唔同，都想有人望吓 啩？」
表面開放、新潮、輕佻，但內裏卻是另一回事。黃銳林一再強調，包浩斯其實是君子：「牛仔褲係爛嘅，袋又不倫不類，但呢啲唔係胡亂設計。一件衣服嘅誕生，經過好多工序。」
「我哋每季都會先去歐洲睇時裝展，研究將會流行邊類服飾，繼而決定我哋會走邊條路線。然後，根據一套嚴格嘅規則，制定推出幾多款恤衫、牛仔褲開幾多個袋。 同時，我和Winnie（黃銳林太太及執行董事唐書文）會監督住設計程序，確保產品唔會太過個人主義，唔係設計師天馬行空想點就點。否則，如果某個人特別 喜歡設計冷衫，嗰個冬季淨賣冷衫，就成為災難喇。一件衫嘅背後，絕對唔簡單，所以我話，包浩斯內裏係君子。」說時一臉正經，之前的嬉皮笑臉去得無蹤無影。
往壞處想 衰極有限
而黃銳林的營商之道，更保守得彷如回到二、三十年代。九一年他創辦包浩斯的百多萬元資金，全是黃氏夫婦倆的積蓄；做生意十四載了，從來不向銀行借貸，開新 店只靠內部資源；即使上市籌集到約八千萬元，亦沒特別用途，只會擴大零售網絡，和擴大產能：「其實我哋一直都無為上市而上市，亦無乜嘢新業務要拓展，資金 亦相當充裕，上市只係提升公司聲譽，將來容易發展海外市場。」
如此保守，黃銳林不覺得是問題，反而因此避過金融風暴及沙士危機，一直無風無浪：「最壞都只係九四、九五年，嗰時好流行Replay901牛仔褲，我哋於是大量入貨，用咗成一百萬元，點知條line突然跌得好快，最後要大減價清貨。」
不過，規行矩步也會導致錯失不少發展機會，例如前身是Green Peace的I.T，出道比包浩斯早三年，但趁近兩年經濟反彈狂開分店，又進駐內地市場，現今市值已達二十一億八千萬元，包浩斯即使以上限價每股一元二角 半計，市值亦只有四億一千萬元，僅及I.T的五分之一，黃銳林辯說：「人哋會諗，呢件貨會點好賣，呢盤生意可以賺幾多錢，諗得好開心；我就向最壞處諗，潮 流嘅嘢變得好快，如果唔好賣，我哋會蝕幾多？蝕唔蝕得起？例如發展內地市場，中國地大物博，單係進駐上海，開一間成本極高，又冇乜意思，但開夠二十間，我 哋又冇能力應付，所以用特許經營模式最穩陣，寧願賺少啲。」
酷愛砌車 唯是單車
不過，講到管理員工，黃銳林的反傳統本色又回來了：「我有兩套準則，所有做正常文書工作嘅同事，如出口部、會計部等，一律返朝九晚五，絕對唔可以遲到；設計師就比較自由，只要佢哋準時交貨，又有質素的話，佢鍾意幾時返就幾時返。不過，如果唔夠水準，我就即刻請佢走。」
「每次和員工有爭執，如果係灰色地帶，我會將利益歸於員工。例如前線行佣金制，爆數就有額外獎金，有次一個女銷售員，見自己仲差少少就夠數，就自己出錢買 貨貼夠，由於我哋設有退貨機制，佢買完後再退貨，俾我發現咗，雖然咁樣唔啱規矩，但我都有發獎金俾佢。因為我覺得，遊戲規則唔完善，係我嘅錯！唯有即刻改 例補鑊囉。同樣地，我要求員工對顧客，都要做到利益歸於顧客。」
至於他的公餘節目，看他一身打扮還以為他酷愛「鍊」車，豈料此車不同彼車，他只愛單車。大埔鹿茵山莊的家裏，就有二十多輛單車，閒時就到大埔或西貢踩單 車：「每星期起碼踩單車十個鐘頭。」前週二訪問當日，黃銳林訂購的新車剛巧到港，若非時間所限，他巴不得立即砌給記者看：「呢架TREK，係六屆環法單車 賽冠軍岩士唐拎冠軍嗰款，全球限量三百部咋！」他的一切，永遠出乎意料。
管理哲學
‧無咁大個頭，唔好戴咁大頂帽，正如進軍大陸市場。
‧不要借錢擴張，就算輸都輸得起。
‧公司規則有紕漏，是自己的錯。
‧利益歸於員工，利益歸於顧客。
文章
0 留言